ថ្នាក់ដឹកនាំមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ស្ពឺ ដឹកនាំមន្ត្រីការិយាល័យជំនាញ អមដំណើរឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ចុះទស្សនកិច្ចនៅស្រុកគងពិសី ខេត្តកំពង់ស្ពឺ ។ក្នុងដំណើរទស្សនកិច្ចស្វែងយល់នេះ ឯកឧត្តមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា បានណែនាំឱ្យក្រុមហ៊ុនធ្វើការសិក្សាបន្ថែមលើការផលិតថាមពលអគ្គិសនីតាមរយៈធ្យូងអង្កាមសម្រាប់ផលិតស្រូវអង្ករ ដើម្បីកាត់បន្ថយថ្លៃដើមផលិត​ និងជួយគាំទ្រវិស័យកសិកម្ម​ផ្សាភ្ជាប់ឧស្សាហកម្ម​។ ការណ៍នេះគ្រាដែលដឹកនាំក្រុមការងារបច្ចេកទេសក្រសួងនិងមន្ទីរកសិកម្ម រុក្ខាប្រម៉ាញ់និងនេសាទខេត្តកំពង់ស្ពឺ អាជ្ញាធរខេត្ត ស្រុកគងពិសីចុះទស្សនកិច្ច​នៅរោងចក្រអង្ករខ្មែរ​ ហ៊្វូត​ គ្រុប (KHMER FOODS GROUP)និងជួបសំណេះសំណាលជាមួយសមាជិកសហគមន៍កសិករព្រៃវិហារ ស្ថិតនៅស្រុកគងពិសី​ ខេត្តកំពង់ស្ពឺ ថ្ងៃទី១៣​ ខែមករា​ ឆ្នាំ២០២៥។នៅក្នុងឱកាសនោះលោក ឌិត ឌីណា បានចុះត្រួតពិនិត្យពីខ្សែចង្វាក់ផលិតកម្មរបស់រោងចក្រអង្ករ​និងបានពិនិត្យមើលពីសណ្ឋានភាពទំហំស្តុកជាក់ស្តែង​សម្រាប់ជួយអន្តរាគមន៍ប្រជាកសិករដាំស្រូវ​។ហើយលើសពីនេះ​លោកបានណែនាំដល់រោងចក្រអង្ករឱ្យមានការសិក្សាបន្ថែមពីការទទួលយកថាមពលអគ្គីសនី​តាមរយៈធ្យូងអង្កាម​សម្រាប់ផលិតកម្មស្រូវអង្ករ​ពិចារណាក្នុងការពង្រីកហេដ្ឋារចនាសម្ព័ន្ធសម្រាប់ការវិនិយោគ សំដៅកាត់បន្ថយថ្លៃដេីមផលិត​ និងជួយគាំទ្រវិស័យកសិកម្ម​ផ្សាភ្ជាប់ឧស្សាហកម្ម​។ជាមួយនោះលោកបានដឹកនាំក្រុមការងារបន្តជួបសំណេះសំណាលជាមួយសហគមន៍កសិករព្រៃវិហារ​ ដែលមានសមាជិក​៩៤៥នាក់​ ធ្វើទៅលើផលិតកម្មបន្លែ​ និងការដាំស្រូវវស្សាសម្រាប់អាជីវកម្ម។ទន្ទឹមនឹងនេះ​ លោកបានលើកទឹកចិត្តដល់សហគមន៍ឱ្យពិនិត្យលទ្ធភាពក្នុងការជំរុញទៅជាសហគមន៍កសិកម្មទំនើប​ដែលមានទុនគ្រប់គ្រាន់​ មានប្រាក់កម្ចីដែលមានអត្រាការប្រាក់ទាប​ មានផែនការផលិតច្បាស់លាស់​ មានការគាំទ្រពីក្រសួងកសិកម្ម​ និងមានទីផ្សារពិតប្រាកដ។រដ្ឋមន្ដ្រី​កសិកម្ម បានលើកឡើងដោយគូសបញ្ជាក់បន្ថែមអំពីសារៈសំខាន់​ និងប្រសិទ្ធភាពសេដ្ឋកិច្ចនៃការប្រើប្រាស់​ពូជស្រូវខ្មែរ​រួមមាន​ ពូជស្រូវសែនក្រអូប និងផ្ការំដួល​ ដែលបានរក្សានូវតម្លៃទីផ្សារបានយ៉ាងល្អ​ មានតម្រូវការទីផ្សារខ្ពស់​ និងមានការអន្តរាគមន៍ពីក្រសួងកសិកម្ម​ផ្ទាល់​ ជាជាងការដាំពូជស្រូវដែលនាំចូលពីបរទេស។បន្ថែមពីនេះលោករដ្ឋមន្ដ្រី​ក៏បានលើកទឹកចិត្តឱ្យប្រជាកសិករពិចារណារួមគ្នាក្នុងការឆ្លេីយតប​ឱ្យចំគោលដៅ​ និងត្រឹមត្រូវគ្រប់ជ្រុងជ្រោយទៅលើអ្នកកេងចំនេញដើម្បីប្រជាប្រិយ​ភាពនិងអ្នកកេងចំនេញប្រយោជន៍នយោបាយ​តាមបណ្តាញសង្គម ដោយបានយក​ផលលំបាករបស់ប្រជាកសិករ​និងកិច្ចខិតខំប្រឹងប្រែងរបស់រាជរដ្ឋាភិបាលធ្វេីជាអាជីវកម្ម​និងបង្កើនភាពល្បីល្បាញរបស់ខ្លួន​ផងដែរ